പിണറായിയില്‍ കോഴി പ്രസവിച്ചു! പിന്നാലെ രക്തസ്രാവമുണ്ടായി ചത്തു

കോഴി പ്രസവിച്ചുവെന്ന വാര്‍ത്തയാണ് കഴിഞ്ഞ ദിവസത്തെ പ്രഭാതം കണ്ണൂരിന് സമീപം പിണറായി വെണ്ടുട്ടായിലെ ജനങ്ങള്‍ക്ക് കൗതുകമായത്. വെണ്ടുട്ടായിലെ തണലില്‍ പി. പുഷ്പന്റെയും കെ.രജിനയുടെ വീട്ടിലാണ് തള്ളക്കോഴിയുടെ പ്രസവം. വാര്‍ത്തയറിഞ്ഞ് നിരവധി പേരാണ് രജിനയുടെ വീട്ടില്‍ എത്തിയത്.

ബീഡി തൊഴിലാളികള്‍ക്കുള്ള ക്ഷേമനിധി പദ്ധതിയിലൂടെ ലഭിച്ച 100 കോഴികളില്‍ ഒന്നാണ് പ്രസവിച്ചത്. കോഴിമുട്ടയില്‍ പലപ്പോഴും രണ്ട് മഞ്ഞക്കരു കാണാറുള്ളതായും മുട്ടകള്‍ക്ക് സാധാരണയില്‍ കവിഞ്ഞ വലുപ്പം ഉണ്ടായിരുന്നതായും ഇവര്‍ പറയുന്നു. ‘ പ്രസവ’ത്തിനുശേഷം തള്ളക്കോഴിക്ക് രക്തസ്രാവമുണ്ടായി അല്‍പ്പസമയത്തിനുള്ളില്‍ ചത്തു.

കോഴിക്കുഞ്ഞിനെ ആവരണം ചെയ്ത് മുട്ടത്തോടുണ്ടായിരുന്നില്ല. വ്യക്തത ലഭിക്കാന്‍ പരിശോധന നടത്തണമായിരുന്നു. എന്നാല്‍ വിവിധ വെറ്ററിനറി ഡോക്ടര്‍മാരുമായി ബന്ധപ്പെട്ടെങ്കിലും ആരും എത്തിയില്ല. തുടര്‍ന്ന് കോഴിയെ കുഴിച്ചിട്ടു.