പെട്രോൾ പമ്പുകൾ വാഹനങ്ങൾക്ക് അരികിലേക്ക്; പദ്ധതി ഉടനെന്ന് അഡ്നോക്

അബുദാബി : ഇന്ധനം നിറയ്ക്കാൻ പെട്രോൾ സ്റ്റേഷൻ ഇനി വാഹനങ്ങൾക്കരികിൽ എത്തും. രാജ്യത്തെ പ്രമുഖ ഇന്ധനവിതരണ കമ്പനിയായ അഡ്നോക് ആണ് പുതുമയാർന്ന പദ്ധതി നടപ്പാക്കുന്നത്. വാഹനങ്ങൾ പാർക്ക് ചെയ്യുന്ന സ്ഥലത്ത് ഇന്ധനമെത്തിക്കുന്ന ഈ സംവിധാനം വൈകാതെ നടപ്പാക്കുമെന്നു കമ്പനിയധികൃതർ സൂചിപ്പിച്ചു.

നൂതന സാങ്കേതിക സംവിധാനങ്ങളുടെ സഹായത്തോടെ ഇടപാടുകാർക്ക് കൂടുതൽ സേവനങ്ങൾ ലഭ്യമാക്കുകയെന്നതാണു ലക്ഷ്യം. ഇപ്പോൾ പരീക്ഷണാടിസ്ഥാനത്തിൽ നടത്തുന്ന വിതരണം കുറ്റമറ്റതാണെന്ന് ഉറപ്പായാൽ വ്യാപിപ്പിക്കുമെന്നും വ്യക്തമാക്കി. അഡ്‌നോക് കമ്പനി വഴി കഴിഞ്ഞ വർഷം 998 കോടി ലീറ്റർ ഇന്ധനമാണ് വിതരണം ചെയ്‌തത്. പുതിയ 24 പെട്രോൾ സ്റ്റേഷനുകൾ തുറക്കുകയും ചെയ്തു. വിവിധ എമിറേറ്റുകളിലായി 360 പെട്രോൾ സ്റ്റേഷനുകൾ അഡ്‌നോക് കമ്പനിയുടെ കീഴിലുണ്ട്.