ആര് ജയിച്ചാലും മാണി: പാലായില്‍ നിന്ന് ആര് ജയിക്കും? പാലായില്‍ മായാതെ മാണി

വര്‍ഗീസ് ഡൊമിനിക്

പാലായില്‍ ആര് ജയിക്കും. മാണി സി കാപ്പനോ ജോസ് കെ മാണിയോ? ഇരുകൂട്ടരും അവകാശവാദം ഉന്നയിക്കുന്നുണ്ട്. ആര് ജയിച്ചാലും അതൊരു ചരിത്രമാണ്. മാണി സി കാപ്പന്‍ ജയിച്ചാല്‍ മാണി എന്ന പേര് വീണ്ടും വരും. ജോസ് കെ മാണി ജയിച്ചാല്‍ കെ.എം.മാണിയുടെ പേര് വരും. പാലായില്‍ മാണി നിലനില്‍ക്കുന്ന ചരിത്രമാണിത്. കെ.എം.മാണി മരിച്ചതിനെ തുടര്‍ന്നു നടന്ന ഉപതെരഞ്ഞെടുപ്പില്‍ മാണി സി കാപ്പന്‍ ജയിച്ചതോടെ മാണി എന്ന പേര് നിലനിന്നിരുന്നു.ഇപ്പോള്‍ യുഡിഎഫിനു വേണ്ടി മാണി സി കാപ്പനും എല്‍ഡിഎഫിനു വേണ്ടി ജോസ് കെ മാണിയുമാണ് മത്സരിക്കുന്നത്.
പാലായില്‍ വിജയം 100 ശതമാനം ഉറപ്പെന്ന് ജോസ് കെ. മാണി പറഞ്ഞു. ഭൂരിപക്ഷം എത്ര എന്നു പറയുന്നില്ല. അതു ജനങ്ങള്‍ തീരുമാനിക്കും: ജോസ് പറഞ്ഞു. 15000 ല്‍ ഏറെ വോട്ടുകളുടെ ഭൂരിപക്ഷം ലഭിക്കുമെന്നു കാപ്പന്‍ പറഞ്ഞു. അപരനെ നിര്‍ത്തിയത് കേരള കോണ്‍ഗ്രസിന് (എം) ആത്മവിശ്വാസം ഇല്ലാത്തതു കൊണ്ടാണ് കാപ്പന്‍ പറഞ്ഞു. പാലായില്‍ ജയിച്ച് എല്‍ഡിഎഫിന് ഭരണം ലഭിച്ചാല്‍ ജോസ് മന്ത്രിയാകും. പാലായില്‍ പരാജയപ്പെട്ടാല്‍ കേരള കോണ്‍ഗ്രസിന്റെ (എം) രാഷ്ട്രീയ നിലനില്‍പ്പിനും ഇളക്കം തട്ടും.

തദ്ദേശ തിരഞ്ഞെടുപ്പിലെ വിജയം, എല്‍ഡിഎഫ് സംഘടനാ ശേഷി ഉപയോഗിച്ചു നടത്തിയ അതിശക്തമായ പ്രചാരണം എന്നിവയാണ് ജോസിന്റെ ആത്മവിശ്വാസത്തിനു പിന്നില്‍. മണ്ഡലത്തില്‍ മനസ്സും ശരീരവും പൂര്‍ണമായി അര്‍പ്പിച്ചാണ് ജോസ് പ്രചാരണം നടത്തിയത്. യുഡിഎഫ് പിന്തുണ, എംഎല്‍എ എന്ന നിലയില്‍ ഒന്നര വര്‍ഷം കൊണ്ട് മണ്ഡലത്തില്‍ നടത്തിയ വികസന പ്രവര്‍ത്തനം, സ്വീകാര്യത എന്നിവയിലാണ് കാപ്പന്റെ പ്രതീക്ഷ. അപരന്റെ സാന്നിധ്യം, പരസ്പരം നടത്തിയ ആരോപണങ്ങള്‍, പാലാ നഗരസഭയിലെ അംഗങ്ങളുടെ കയ്യാങ്കളി എന്നിവ തിരഞ്ഞെടുപ്പില്‍ ചര്‍ച്ചയാകും.