വിജയ് ഹസാരെ ട്രോഫി: ക്വാര്‍ട്ടറില്‍ കര്‍ണാടകയോട് തോറ്റ് കേരളം പുറത്ത്

വിജയ് ഹസാരെ ട്രോഫി ടൂര്‍ണമെന്റില്‍ സെമി കാണാതെ കേരളം പുറത്ത്. ക്വാര്‍ട്ടര്‍ ഫൈനലില്‍ കര്‍ണാടകയോട് തോറ്റാണ് കേരളം പുറത്തായത്. കര്‍ണാടക ഉയര്‍ത്തിയ 339 വിജയലക്ഷ്യം പിന്തുടര്‍ന്ന കേരളം 43.4 ഓവറില്‍ 258 റണ്‍സിന് പുറത്തായി. 80 റണ്‍സിനാണ് കര്‍ണാടകയുടെ വിജയം.

ടോസ് നേടി ആദ്യ ബാറ്റിങ്ങിനിറങ്ങിയ കര്‍ണാടക 50 ഓവറില്‍ മുന്ന് വിക്കറ്റിന് 338 റണ്‍സ് വിജയലക്ഷ്യം ഉയര്‍ത്തുകയായിരുന്നു. കര്‍ണാടകയ്ക്കായി ഓപ്പണര്‍മാരായ രവി കുമാര്‍ സമര്‍ഥും ദേവ്ദത്ത് പടിക്കലും ചേര്‍ന്നാണ് തകര്‍പ്പന്‍ പ്രകടനം പുറത്തെടുത്തത്.

ഇരുവരും ചേര്‍ന്ന് ഓപ്പണിങ് കൂട്ടുകെട്ടില്‍ 249 റണ്‍സാണ് ഉയര്‍ത്തിയത്. സമര്‍ഥ് 192 റണ്‍സും ദേവ്ദത്ത് പടിക്കല്‍ 101 റണ്‍സുമെടുത്തു. കേരളത്തിനായി മൂന്ന് വിക്കറ്റെടുത്ത ബേസില്‍ മാത്രമാണ് മികച്ച പ്രകടനം കാഴ്ചവെച്ചത്.