സമുദായ സ്‌പര്‍ദയുണ്ടാക്കാന്‍ ശ്രമം : മെട്രോമാൻ ഇ ശ്രീധരനെതിരെ പൊലീസില്‍ പരാതി

മലപ്പുറം: മെട്രോമാന്‍ ഇ ശ്രീധരനെതിരെ പൊലീസില്‍ പരാതി. സമുദായ സ്‌പര്‍ദയുണ്ടാക്കാന്‍ ശ്രമിച്ചെന്ന് കാട്ടിയാണ് ശ്രീധരനെതിരെ പരാതി. ലൗ ജിഹാദ്, മാംസാഹാരം കഴിക്കുന്നവരോട് വെറുപ്പ് എന്നീ പ്രസ്‌താവനകള്‍ സമൂഹത്തില്‍ മതസ്‌പര്‍ദക്ക് കാരണമാകുമെന്ന് പറഞ്ഞാണ് കൊച്ചി സ്വദേശി അഡ്വ അനൂപ് വി ആര്‍ ആണ് പൊന്നാനി പൊലീസ് സ്‌റ്റേഷനില്‍ പരാതി നല്‍കിയത്.

ബി ജെ പിയില്‍ ചേര്‍ന്നതിന് പിന്നാലെ നല്‍കിയ അഭിമുഖത്തിലായിരുന്നു ശ്രീധരന്റെ വിവാദ പരമാര്‍ശങ്ങള്‍. ബീഫ് നിരോധനവുമായി ബന്ധപ്പെട്ട് ഉയര്‍ന്ന ചോദ്യത്തിന് സസ്യാഹാരിയാണ് താനെന്നും ആരും മാംസം കഴിക്കുന്നത് തനിക്ക് ഇഷ്‌ടമല്ലെന്നും അത്തരക്കാരെ ഇഷ്‌ടപ്പെടുന്നില്ലെന്നുമായിരുന്നു പ്രതികരണം. ഈ പരാമര്‍ശങ്ങളാണ് വിവാദമായി മാറിയത്

ലൗ ജിഹാദ് കേരളത്തില്‍ നടന്നതൊക്കെ കണ്ടിട്ടുണ്ടെന്നും ശ്രീധരന്‍ പ്രതികരിച്ചു. ഹിന്ദു പെണ്‍കുട്ടികളെ കബളിപ്പിച്ച്‌ വിവാഹം കഴിക്കുന്നതും, അതിന്റെ പേരില്‍ പിന്നീടവര്‍ പ്രയാസപ്പെടുന്നതുമൊക്കെ താന്‍ കണ്ടിട്ടുളളതാണ്. പെണ്‍കുട്ടികള്‍ വഞ്ചിതരാകാറുണ്ടെന്നും അത്തരത്തിലുളള പ്രവൃത്തിയെ താന്‍ തീര്‍ച്ചയായും എതിര്‍ക്കുമെന്നും ശ്രീധരന്‍ അഭിമുഖത്തില്‍ പറഞ്ഞിരുന്നു.