‘ഗാന്ധിഘാതകന്റെ ലൈബ്രറി വേണ്ട’; തുറന്ന ഉടന്‍ ഗോഡ്സെയുടെ ലൈബ്രറി പൂട്ടിച്ചു

രാഷ്ട്രപിതാവ് മഹാത്മാ ഗാന്ധിയെ വധിച്ച നാഥുറാം ഗോഡ്സെയുടെ പേരില്‍ നിര്‍മ്മിച്ച ലൈബ്രറി അടച്ചുപൂട്ടി. മധ്യപ്രദേശിലെ ഗ്വാളിയറില്‍ രണ്ട് ദിവസം മുന്‍പാണ് ലൈബ്രറി ആരംഭിച്ചത്. ലൈബ്രറിക്കെതിരെ വന്‍ പ്രതിഷേധം ഉയര്‍ന്ന സാഹചര്യത്തിലാണ് ജില്ലാ ഭരണകൂടം സ്ഥാപനം അടച്ചുപൂട്ടിയത്.

അഖില ഭാരതീയ ഹിന്ദു മഹാസഭയുടെ നേതൃത്വത്തില്‍ ഗോഡ്സെയുടെ ജീവിതവും ‘പ്രത്യയശാസ്ത്രവും’ ഭാവിതലമുറയ്ക്കു പഠിക്കാന്‍ വേണ്ടിയാണ് ‘ജ്ഞാനശാല’ തുറന്നത്. ഗോഡ്സെയുടെ ലേഖനങ്ങളും പ്രസംഗവും ഗാന്ധിജിയെ വധിക്കാന്‍ നടത്തിയ പരിശ്രമങ്ങളെപ്പറ്റിയുള്ള വിവരങ്ങളടങ്ങുന്ന പുസ്തകങ്ങളാണ് പ്രധാനമായും ലൈബ്രറിയില്‍ ഉള്‍പ്പെടുത്തിയിരുന്നത്. ഗാന്ധി വധത്തിനുള്ള പദ്ധതികള്‍ ഗോഡ്സെ ആവിഷ്‌ക്കരിക്കുന്നത് ഗ്വാളിയാറില്‍വെച്ചാണെന്ന കാരണത്താലാണ് ഇവിടെ ലൈബ്രറി ആരംഭിക്കുന്നത്. മാത്രമല്ല, വിഭജനത്തിനെതിരെ നിലകൊണ്ടതാണ് ഗോഡ്സെയുടെ ജീവന്‍ നഷ്ഠമാക്കാന്‍ ഇടയാക്കിയതെന്നും സംഘടനാ ഭാരവാഹികള്‍ പറയുന്നു.

ഇതിനുമുന്‍പും ഭാരതീയ ഹിന്ദു മഹാസഭ ഗ്വാളിയറില്‍ ഗോഡ്സെയ്ക്കു വേണ്ടി അമ്പലം നിര്‍മിക്കാന്‍ തീരുമാനിച്ചെങ്കിലും പൊതുജനങ്ങളുടേയും മറ്റു കക്ഷികളുടേയും എതിര്‍പ്പിനെ തുടര്‍ന്ന് തീരുമാനം മാറ്റുകയായിരുന്നു. ഗോഡ്സെയായിരുന്നു യഥാര്‍ഥ രാജ്യസ്നേഹിയെന്ന് ലോകത്തെ ബോധ്യപ്പെടുത്താനാണ് ലൈബ്രറി തുടങ്ങിയതെന്ന സംഘടന നിലപാടിനെതിരെ വലിയ പ്രതിഷേധം ഉയര്‍ന്നിരുന്നു.