വിജയ് ചിത്രം മാസ്റ്ററിന്‍റെ ക്ലൈമാക്സ് ചോര്‍ന്നു : പ്രധാന ഭാഗങ്ങള്‍ സോഷ്യല്‍ മീഡിയയില്‍

ചെന്നൈ : വിജയ് ചിത്രം മാസ്റ്ററിന്‍റെ ക്ലൈമാക്സ് ചോര്‍ന്നു. സമൂഹമാദ്ധ്യമങ്ങളിലാണ് ചിത്രത്തിന്റെ പ്രധാന ഭാഗങ്ങള്‍ പ്രചരിക്കുന്നത്. ഒന്നര വര്‍ഷത്തെ അധ്വാനം തകര്‍ക്കരുതെന്ന് സംവിധായകന്‍ ലോകേഷ് കനകരാജ് ട്വിറ്ററിലൂടെ ആവശ്യപ്പെട്ടു.

“പ്രിയപ്പെട്ടവരേ, ഒന്നരവര്‍ഷത്തെ കഷ്ടപ്പാടിന് ശേഷമാണ് മാസ്റ്റര്‍ സിനിമയെ നിങ്ങളിലേക്ക് എത്തിക്കുന്നത്. അത് നിങ്ങള്‍ തിയേറ്ററുകളില്‍ ആസ്വദിക്കുമെന്ന പ്രതീക്ഷ മാത്രമാണ് ഞങ്ങള്‍ക്കുള്ളത്. സിനിമയില്‍ നിന്ന് ചോര്‍ന്ന ക്ലിപ്പുകള്‍ നിങ്ങള്‍ക്ക് ലഭിക്കുകയാണെങ്കില്‍, ദയവായി ഇത് പങ്കിടരുത്. നിങ്ങള്‍ക്ക് എല്ലാവര്‍ക്കും നന്ദി. എല്ലാവര്‍ക്കും സ്നേഹം. ഒരു ദിവസം കൂടിയേ ഉള്ളൂ. പിന്നെ മാസ്റ്റര്‍ നിങ്ങളിലേക്ക്….” അദ്ദേഹം ട്വീറ്റ് ചെയ്തു.

കഴിഞ്ഞ ദിവസം വിതരണക്കാര്‍ക്കായി ഒരു ഷോ നടത്തിയിരുന്നു. ഇവിടെ നിന്നാകാം ചിത്രത്തിലെ രംഗങ്ങള്‍ ചോര്‍ന്നതെന്നാണ് സൂചന. വിതരണക്കമ്പനിയിലെ ജീവനക്കാരനെതിരെ നിര്‍മാണ കമ്ബനി പൊലീസില്‍ പരാതി നല്‍കി. നാളെയാണ് ചിത്രം റിലീസ് ചെയ്യുന്നത്.