പാര്‍ട്ടി ചിഹ്നം വിമത സ്ഥാനാര്‍ത്ഥിക്ക്; യു.ഡി.എഫ്-ആര്‍.എം.പി സഖ്യത്തിന് പ്രചരണത്തിനിറങ്ങില്ലെന്ന് മുരളീധരന്‍

വടകര ബ്ലോക്ക് പഞ്ചായത്തിലെ കല്ലാമല ഡിവിഷനില്‍ യു.ഡി.എഫ്-ആര്‍.എം.പി സഖ്യത്തിനായി പ്രചരണത്തിനിറങ്ങില്ലെന്ന് കെ. മുരളീധരന്‍ എം.പി. ഇവിടെ കോണ്‍ഗ്രസ് വിമതനെ കെ.പി.സി.സി പ്രസിഡന്‍്റ് മുല്ലപ്പള്ളി രാമചന്ദ്രന്‍ പിന്തുണച്ചതാണ് കാരണം. കോണ്‍ഗ്രസ് വിമതന് കൈപ്പത്തി ചിഹ്നം അനുവദിച്ചു. ഇത് തന്നോട് ആലോചിക്കാതെയാണെന്ന് മുരളീധരന്‍ പറഞ്ഞു.

ധാരണ പ്രകാരം ഇവിടെ ആര്‍.എം.പിക്കാണ് സീറ്റ് നല്‍കിയത്. എന്നാല്‍ കോണ്‍ഗ്രസ് വിമതന്‍ നാമനിര്‍ദ്ദേശ പത്രിക നല്‍കി. നേതൃത്വത്തിന്‍െ്റ നിര്‍ദ്ദേശ പ്രകാരമാണ് മത്സരിക്കുന്നതെന്നാണ് വിമതന്‍ വ്യക്തമാക്കിയത്. ഇയാള്‍ക്ക് പാര്‍ട്ടി ചിഹ്നം അനുവദിക്കുകയും ചെയ്തു.

വടകര നഗരസതഭയിലും ഒഞ്ചിയം, ഏറാമല, അഴിയൂര്‍, ചേറോട് പഞ്ചായത്തുകളിലും യു.ഡി.എഫ്-ആര്‍.എം.പി സഖ്യമാണ് മത്സരിക്കുന്നത്. കോണ്‍ഗ്രസ്-ലീഗ്-ആര്‍.എം.പി സഖ്യം ഒരുമിച്ച് പ്രവര്‍ത്തിക്കാന്‍ ധാരണയായതിന് പിന്നാലെയാണ് കോണ്‍ഗ്രസ് വിമതന്‍ ജയകുമാര്‍ മത്സരരംഗത്ത് വന്നത്. ആര്‍.എം.പി ഏരിയാ കമ്മറ്റി അംഗം സുഗതനാണ് യു.ഡി.എഫ്-ആര്‍.എം.പി മുന്നണി സ്ഥാനാര്‍ത്ഥി.