Connect with us
Malayali Express

Malayali Express

സ്വര്‍ണ്ണക്കടത്ത് കേസ് : ഭരണതലപ്പത്തുള്ളവരുടെ അടുപ്പക്കാരെ രക്ഷിക്കാനുള്ള വ്യഗ്രത-കെ.സുരേന്ദ്രന്‍

KERALA

സ്വര്‍ണ്ണക്കടത്ത് കേസ് : ഭരണതലപ്പത്തുള്ളവരുടെ അടുപ്പക്കാരെ രക്ഷിക്കാനുള്ള വ്യഗ്രത-കെ.സുരേന്ദ്രന്‍

Published

on

നയതന്ത്ര ബാഗേജ് എന്ന വാദം ആവര്‍ത്തിച്ച് ഉന്നയിക്കുന്നത് വഴി സ്വര്‍ണക്കടത്ത് കേസ് അന്വേഷണം വഴിതെറ്റിക്കാനാണ് സി.പി.എം ശ്രമിക്കുന്നതെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍. കേസിലെ മുഖ്യപ്രതികളുടെ വാദം തന്നെയാണ് തോമസ് ഐസക് അടക്കമുള്ളവര്‍ ഉന്നയിക്കുന്നത്. എന്‍ഐഎയുടെ വാര്‍ത്താക്കുറിപ്പ് ഉയര്‍ത്തിക്കാട്ടുന്നവര്‍ അന്വേഷണ ഏജന്‍സി കോടതിയില്‍ കൊടുത്ത റിപ്പോര്‍ട്ട് മറച്ചു പിടിക്കുകയാണ്. ഭരണതലപ്പത്തുള്ളവരുടെ അടുപ്പക്കാരെ രക്ഷിക്കാനുള്ള വ്യഗ്രതയാണ് ഇതിലൂടെ പുറത്ത് വരുന്നത്.

അന്വേഷണം നല്ല രീതിയില്‍ പുരോഗമിക്കുന്നതില്‍ സംസ്ഥാന സര്‍ക്കാരിന് എന്താണ് വെപ്രാളം ? രാജ്യ വിരുദ്ധ പ്രവര്‍ത്തിയുടെ പങ്ക് പറ്റിയവരിലേക്കുള്ള അന്വേഷണ ഏജന്‍സിയുടെ പോക്ക് താക്കോല്‍ സ്ഥാനക്കാരിലെത്തുമെന്ന ആശങ്കയാണോ ഇത്തരം വാദങ്ങള്‍ക്ക് പ്രചോദനം ? സ്വര്‍ണ്ണക്കടത്തിന്റെ പൂര്‍ണ്ണ ഉത്തരവാദിത്വം യു.എ.ഇയുടെ തലയിലിടാനുള്ള സി പി എം ശ്രമം ആരെ രക്ഷിക്കാനാണ് ? നയതന്ത്ര ഉദ്യോഗസ്ഥരെ ചട്ടവിരുദ്ധമായി പിടിച്ചു വയ്ക്കണമായിരുന്നു എന്ന് ആവശ്യപ്പെടുന്നവരുടെ ലക്ഷ്യം യു.എ.ഇയുമായുള്ള ഇന്ത്യയുടെ നല്ല ബന്ധം ഇല്ലാതാക്കലാണെന്നും സുരേന്ദ്രന്‍ പ്രസ്താവനയില്‍ ആരോപിച്ചു.

നയതന്ത്ര ബാഗേജ് എന്നത് രണ്ട് രാജ്യങ്ങള്‍ തമ്മില്‍ ഔദ്യോഗികമായി നടക്കുന്ന ഇടപാടാണ്. ഫൈസല്‍ ഫരീദെന്ന കള്ളക്കടത്തുകാരന്‍ അയച്ചത് നയതന്ത്ര ബാഗേജാണെന്ന് സ്ഥാപിക്കുന്നത് യുഎഇ യെ അപമാനിക്കലാണ്. നയതന്ത്ര ബാഗേജാണെന്ന് തെറ്റിദ്ധരിപ്പിച്ചാണ് സ്വര്‍ണ്ണക്കടത്ത് നടത്തിയതെന്ന് എന്‍.ഐ.എ റിപ്പോര്‍ട്ടില്‍ വ്യക്തമായി പറയുന്നുണ്ട്. വിയന്ന കണ്‍വന്‍ഷന്‍ പ്രകാരം നയതന്ത്ര ബാഗേജിന്റെ നിര്‍വചനം എന്തെന്ന് തോമസ് ഐസക് വായിച്ചു പഠിക്കണം.

വി.മുരളീധരനെതിരെ വായില്‍ തോന്നിയത് പറയുന്ന കൊടിയേരി ആദ്യം കെ.ടി ജലീലിന്റെ ഇടപാടുകള്‍ പരിശോധിക്കണം. രാജ്യത്തെ ചട്ടങ്ങള്‍ മറികടന്ന് വിദേശരാജ്യവുമായി കൊടുക്കല്‍ വാങ്ങലുകള്‍ നടത്തിയ ജലീലിന്റെ രാജിയാണ് പാര്‍ട്ടി സെക്രട്ടറി ആവശ്യപ്പെടേണ്ടത്. വിദേശകാര്യ മന്ത്രാലയത്തിന്റെ പ്രോട്ടോക്കോള്‍ ബുക്കില്‍ പറഞ്ഞിരിക്കുന്ന കാര്യങ്ങള്‍ ജലീല്‍ പാലിച്ചിട്ടുണ്ടോയെന്ന് ജനങ്ങള്‍ക്ക് മുന്നില്‍ വിശദീകരിക്കാന്‍ കോടിയേരിയെ വെല്ലുവിളിക്കുന്നു. രാജ്യത്തെ ഒറ്റുകൊടുത്തവര്‍ക്ക് സ്വന്തം ഓഫീസ് താവളമാക്കാന്‍ അനുവദിച്ച മുഖ്യമന്ത്രിയോട് രാജിവെക്കാന്‍ ഉപദേശിക്കുകയാണ് കോടിയേരി ചെയ്യേണ്ടതെന്നും സുരേന്ദ്രന്‍ ഓര്‍മ്മിപ്പിച്ചു.

Continue Reading

Latest News