ആലപ്പുഴയില്‍ സമ്പര്‍ക്കത്തിലൂടെ കോവിഡ് രോഗികളുടെ എണ്ണം കൂടുന്നു

ആലപ്പുഴ: ജില്ലയില്‍ കൊവിഡ് സമ്പര്‍ക്ക രോഗികളുടെ എണ്ണം ഉയരുന്നതില്‍ ആശങ്ക. നൂറനാട് ഇന്തോ ടിബറ്റന്‍ സേനയിലെ 76 ഉദ്യോഗസ്ഥര്‍ക്ക് കൂടി രോഗം സ്ഥിരീകരിച്ചു. രോഗ വ്യാപനം കണക്കിലെടുത്ത് തീര മേഖലയിലെ എട്ടു പഞ്ചായത്തുകളില്‍ ട്രിപ്പിള്‍ ലോക്ക് ഡൗണ്‍ പ്രഖ്യാപിച്ചിട്ടുണ്ട്.

നേരത്തെ രോഗം സ്ഥിരീകരിച്ച 55 ഐടിബിപി ഉദ്യോഗസ്ഥര്‍ക്കു പുറമെയാണ് 76 പേര്‍ക്കു കൂടി കോവിഡ് പോസിറ്റീവായത്. ഇതോടെ മൊത്തം 131 പേര്‍ക്ക് നൂറനാട് ക്യാമ്പില്‍ രോഗം സ്ഥിരീകരിച്ചു. മാവേലിക്കര എംഎല്‍എ ആര്‍ രാജേഷ് ആണ് ഇക്കാര്യം അറിയിച്ചത്. ആരോഗ്യ പ്രവര്‍ത്തകര്‍ക്ക് ഉള്‍പ്പെടെ രോഗം സ്ഥിരീകരിച്ച ചേര്‍ത്തലയിലും സ്ഥിതി രൂക്ഷമാണ്.

തീരമേഖലയിള്‍ ഉള്‍പ്പെട്ട പട്ടണക്കാട് , കടക്കരപ്പള്ളി, ചേര്‍ത്തല തെക്ക്, മാരാരിക്കുളം വടക്ക് , കോടംതുരുത്ത്, കുത്തിയതോട്, തുറവൂര്‍, ആറാട്ടുപുഴ പഞ്ചായത്തുകളില്‍ ട്രിപ്പിള്‍ ലോക്ക് ഡൗണ്‍ നിലവില്‍ വന്നു. ലോക്ക് ഡൗണ്‍ മേഖലയിലുള്ള കുടുംബങ്ങള്‍ക്ക് 5 കിലോ അരി സൗജന്യമായി നല്‍കും.