കർണാടകയിൽ മത പരിവർത്തനത്തിനെതിരായ ബില്ലായ കർണാടക പ്രൊട്ടക്ഷൻ ഓഫ് റൈറ്റ് ടു ഫ്രീഡം ഓഫ് റിലീജിയൻ ബിൽ 2021ന്റെ കരടിൽ വ്യവസ്ഥ ചെയ്യുന്നത് കർശന ശിക്ഷകൾ. പട്ടികജാതി, പട്ടികവർഗ സമുദായങ്ങളിലുള്ളവർ പ്രായപൂർത്തിയാകാത്തവർ, സ്ത്രീകൾ എന്നിവരെ നിർബന്ധിത മതപരിവർത്തനത്തിന് വിധേയരാക്കിയാൽ പരമാവധി 10 വർഷം തടവാണ് കരടിൽ വ്യവസ്ഥ ചെയ്യുന്നത്.
ബെലഗാവിയിലെ ശീതകാല സമ്മേളനത്തിൽ കർണാടക നിയമസഭയിൽ ഈ കർശനമായ ബിൽ അവതരിപ്പിക്കാൻ ഭരണകക്ഷിയായ ബി.ജെ.പി സമ്മർദ്ദം ചെലുത്തുന്നു. നിർദ്ദിഷ്ട നിയമനിർമ്മാണത്തിന്റെ സാധുത പരിശോധിക്കാൻ സംസ്ഥാന സർക്കാർ കഴിഞ്ഞ കുറച്ച് ദിവസങ്ങളായി നിരവധി യോഗങ്ങൾ നടത്തി. ബുധനാഴ്ച രാത്രി ചേർന്ന നിയമസഭാ കക്ഷി യോഗത്തിൽ, നടപ്പ് സമ്മേളനത്തിൽ തന്നെ ബിൽ സഭയിൽ അവതരിപ്പിക്കാൻ ബിജെപി തീരുമാനിച്ചു.
അന്തിമ ബില്ലിൽ മതപരിവർത്തനത്തിന് നൽകേണ്ട ശിക്ഷയുടെ അളവിൽ ഇപ്പോഴും അഭിപ്രായവ്യത്യാസങ്ങളുണ്ടെന്ന് സർക്കാർ വൃത്തങ്ങൾ അറിയിച്ചു. “അന്തിമ തീരുമാനം സംസ്ഥാന മന്ത്രിസഭയുടെ വിവേചനാധികാരത്തിന് വിടാൻ ഞങ്ങൾ തീരുമാനിച്ചു, അത് നിയമസഭയിൽ അവതരിപ്പിക്കുന്നതിന് മുമ്പ് ബിൽ ഉടൻ പരിശോധിക്കും. ശിക്ഷകൾ അന്തിമമായിട്ടില്ല, ”ബില്ലിന്റെ കരട് തയ്യാറാക്കുന്ന ഒരു സർക്കാർ ഉദ്യോഗസ്ഥൻ പറഞ്ഞു.
“വിവിധ സംസ്ഥാനങ്ങളിൽ നിലവിലുള്ള മതപരിവർത്തന നിയമങ്ങൾ ഞങ്ങൾ പരിഗണിച്ചു. ഈ നിയമങ്ങൾ വെല്ലുവിളിക്കപ്പെട്ടപ്പോൾ പുറപ്പെടുവിച്ച വിധികളും ഞങ്ങൾ പരിഗണിച്ചു. ഈ വശങ്ങളെല്ലാം പരിഗണിച്ചാണ് ബില്ലിന്റെ കരട് തയ്യാറാക്കുന്നത്,” അതിന്റെ കരട് നിർമ്മാണ പ്രക്രിയയെക്കുറിച്ച് അറിയാവുന്ന ഒരു ഉദ്യോഗസ്ഥൻ പറഞ്ഞു.
സംസ്ഥാന മന്ത്രിസഭ ഡിസംബർ 20ന് ബെലഗാവിയിൽ ചേരും, കരട് ബിൽ യോഗത്തിലും തുടർന്ന് അടുത്തയാഴ്ച നിയമസഭയിലും അവതരിപ്പിക്കുമെന്ന് പ്രതീക്ഷിക്കുന്നു.
2023ലെ സംസ്ഥാന നിയമസഭാ തെരഞ്ഞെടുപ്പിന് മുന്നോടിയായി രാഷ്ട്രീയ സ്വാധീനം സൃഷ്ടിക്കുന്നതിനുള്ള ഒരു ഉപകരണമായി ബിജെപി ബില്ലിനെ കാണുന്നു. ലെജിസ്ലേറ്റീവ് കൗൺസിലിൽ സംയുക്ത പ്രതിപക്ഷ എതിർപ്പ് വരാൻ സാധ്യത ഉണ്ടായിരുന്നിട്ടും ബില്ലുമായി മുന്നോട്ട് പോകാൻ ബിജെപി താൽപ്പര്യപ്പെടുന്നു.
ബിൽ എതിർക്കാൻ പ്രതിപക്ഷമായ കോൺഗ്രസ്, ജെഡിഎസ് പാർട്ടികൾ തീരുമാനിച്ചിട്ടുണ്ട്.
നിർദിഷ്ട പുതിയ മതപരിവർത്തന വിരുദ്ധ നിയമത്തിന്റെ നിലവിലെ കരട് രൂപത്തിൽ, “തെറ്റിധാരണ, ബലപ്രയോഗം, വഞ്ചന, അനാവശ്യ സ്വാധീനം, നിർബന്ധം, വിവാഹം എന്നിവയിലൂടെ ഒരു മതത്തിൽ നിന്ന് മറ്റൊരു മതത്തിലേക്ക് പരിവർത്തനം ചെയ്യുന്നത്” നിരോധിക്കും എന്ന് പറയുന്നു.
“ഒരു വ്യക്തിയും ഒരു മതത്തിൽ നിന്ന് നേരിട്ടോ അല്ലാതെയോ മറ്റൊരു മതത്തിലേക്ക് മതപരിവർത്തനം നടത്തരുത്, തെറ്റിദ്ധരിപ്പിക്കുക, ബലപ്രയോഗം, അനാവശ്യ സ്വാധീനം, ബലപ്രയോഗം, വശീകരിക്കൽ അല്ലെങ്കിൽ ഏതെങ്കിലും വഞ്ചനാപരമായ മാർഗങ്ങളിലൂടെയോ വിവാഹത്തിലൂടെയോ മതം മാറ്റരുത്. അതിനായി ഗൂഢാലോചന നടത്തരുത്,” എന്ന് ബിജെപി സർക്കാരിന്റെ പരിഗണനയിലുള്ള കരട് ബില്ലിൽ പറയുന്നു.
മതം മാറുന്ന വ്യക്തിയുടെ കുടുംബാംഗങ്ങൾക്കോ അല്ലെങ്കിൽ മതം മാറുന്ന വ്യക്തിയുമായി ബന്ധമുള്ള മറ്റേതെങ്കിലും വ്യക്തിക്കോ മതപരിവർത്തനം സംബന്ധിച്ച പരാതികൾ ഫയൽ ചെയ്യാമെന്നും നിർദിഷ്ട നിയമനിർമ്മാണത്തിൽ പറയുന്നു.
പൊതുവിഭാഗത്തിൽപ്പെട്ടവരുടെ കാര്യത്തിൽ നിയമം ലംഘിക്കുന്നവർക്ക് മൂന്ന് വർഷം മുതൽ അഞ്ച് വർഷം വരെ തടവും 25,000 രൂപ പിഴയുമാണ് വ്യവസ്ഥ ചെയ്യുന്നത്. പ്രായപൂർത്തിയാകാത്തവരെയും സ്ത്രീകളെയും SC, ST വിഭാഗങ്ങളിൽ നിന്നുള്ള വ്യക്തികളെയും മതം മാറ്റുന്ന ആളുകളുടെ കാര്യത്തിൽ മൂന്ന് മുതൽ 10 വർഷം വരെ തടവും 50,000 രൂപ പിഴയും നിർദേശിച്ചിട്ടുണ്ട്.
നിർദിഷ്ട നിയമപ്രകാരം ഒരു മജിസ്ട്രേറ്റ് കോടതിയിൽ വിചാരണ ചെയ്യാവുന്ന ജാമ്യമില്ലാ കുറ്റമായി നിർബന്ധിത മതപരിവർത്തനത്തെ കണക്കാക്കപ്പെടുന്നു.
നിയമം പ്രാബല്യത്തിൽ വന്നതിന് ശേഷം മറ്റൊരു മതത്തിലേക്ക് മാറാൻ ആഗ്രഹിക്കുന്ന ഏതൊരു വ്യക്തിയും പരിവർത്തനത്തിന് രണ്ട് മാസം മുമ്പ് ജില്ലാ മജിസ്‌ട്രേറ്റിന് നോട്ടീസ് നൽകണം. മതപരിവർത്തനം നടത്തുന്ന വ്യക്തി ഒരു മാസം മുമ്പ് അറിയിപ്പ് നൽകണം. കൂടാതെ മതപരിവർത്തനത്തിന്റെ യഥാർത്ഥ ലക്ഷ്യത്തെക്കുറിച്ച് ജില്ലാ മജിസ്ട്രേറ്റ് പോലീസ് മുഖേന അന്വേഷണം നടത്തണമെന്നും കരട് നിയമത്തിൽ പറയുന്നു.
അധികാരികളെ അറിയിക്കാതിരുന്നാൽ കരട് ബിൽ പ്രകാരം മതം മാറുന്ന വ്യക്തികൾക്ക് ആറ് മാസം മുതൽ മൂന്ന് വർഷം വരെ തടവും മതപരിവർത്തനം നടത്തുന്ന വ്യക്തികൾക്ക് ഒരു വർഷം മുതൽ അഞ്ച് വർഷം വരെ തടവും ലഭിക്കും.
മതം മാറിയ വ്യക്തി, പരിവർത്തനം നടന്ന് 30 ദിവസത്തിനകം ജില്ലാ മജിസ്ട്രേറ്റിനെ അറിയിക്കണമെന്നും ഐഡന്റിറ്റി സ്ഥിരീകരിക്കാൻ ജില്ലാ മജിസ്ട്രേറ്റ് മുമ്പാകെ ഹാജരാകണമെന്നും നിർദിഷ്ട നിയമം ആവശ്യപ്പെടുന്നു. മജിസ്ട്രേറ്റിനെ അറിയിച്ചില്ലെങ്കിൽ പരിവർത്തനം അസാധുവായി പ്രഖ്യാപിക്കും.
കോൺഗ്രസും ജെഡിഎസും ഉൾപ്പെടെയുള്ള പ്രതിപക്ഷ പാർട്ടികൾ ബില്ലിനെ എതിർക്കുമെന്ന് അറിയിച്ചിരുന്നു. “ജനങ്ങൾക്ക് ഇഷ്ടമുള്ള മതത്തിലേക്ക് മാറാൻ ഭരണഘടനയിൽ വ്യവസ്ഥയുണ്ട്. നിർബന്ധിത മതപരിവർത്തനങ്ങൾ ഉണ്ടായാൽ കർശന നിയമനടപടികൾ സ്വീകരിക്കാം. മതപരിവർത്തന നിരോധന നിയമം ബിജെപിയുടെ വർഗീയ അജണ്ടയുടെ ഭാഗമാണ്. ബിജെപിക്ക് അവരുടെ നേട്ടങ്ങളുടെ അടിസ്ഥാനത്തിൽ വോട്ട് ചോദിക്കാനുള്ള ധൈര്യമില്ല, അതിനാൽ അവർ ജനങ്ങളുടെ മനസ്സിലേക്ക് വർഗീയതയുടെ വിഷം കുത്തിവയ്ക്കുകയാണ്. അവർ ഹിന്ദുത്വ അജണ്ട ഉപയോഗിച്ച് തെരഞ്ഞെടുപ്പിൽ വിജയിക്കാൻ ആഗ്രഹിക്കുന്നു,” മുൻ കോൺഗ്രസ് മുഖ്യമന്ത്രി സിദ്ധരാമയ്യ പറഞ്ഞു.
ബില്ലിനെ തങ്ങളുടെ പാർട്ടി എതിർക്കുമെന്ന് ജെഡിഎസ് നേതാവും മുൻ മുഖ്യമന്ത്രിയുമായ എച്ച് ഡി കുമാരസ്വാമി പറഞ്ഞു.
ഉത്തർപ്രദേശ്, ഹിമാചൽ പ്രദേശ്, മധ്യപ്രദേശ് എന്നിവയുൾപ്പെടെ ബിജെപി ഭരിക്കുന്ന മറ്റ് ചില സംസ്ഥാനങ്ങളിലും സമാനമായ മതപരിവർത്തന വിരുദ്ധ നിയമങ്ങൾ കൊണ്ടുവന്നിട്ടുണ്ട്. അവയുടെ സാധുത ചില കോടതികളിൽ ചോദ്യം ചെയ്യപ്പെട്ടിട്ടുണ്ട്.
