Connect with us
Malayali Express

Malayali Express

ഹരിത സന്ദേശവുമായി സൈക്കിള്‍ സവാരി സംഘം കൊച്ചിയില്‍ നിന്നും മൂന്നാറിലെത്തി

KERALA

ഹരിത സന്ദേശവുമായി സൈക്കിള്‍ സവാരി സംഘം കൊച്ചിയില്‍ നിന്നും മൂന്നാറിലെത്തി

Published

on

സമൂഹത്തിന് പ്രകൃതി സംരക്ഷണത്തിന്റെ സന്ദേശം പകര്‍ന്ന് കൊച്ചിയില്‍ നിന്നുമെത്തിയ സൈക്കിള്‍ യാത്രാ സംഘം മൂന്നാറിലെത്തി. തൃപ്പൂണിത്തുറ ആസ്ഥാനമായുള്ള പെഡല്‍ ഫോഴ്സ് സംഘമാണ് പരിപാടി സംഘടിപ്പിച്ചത്. ഇന്നലെ പുലര്‍ച്ചെ അഞ്ചിന് കൊച്ചിയില്‍ നിന്നും ഇരുപത് സൈക്കിളുകളില്‍ സഞ്ചരിച്ചാണ് സേവ് പ്ലാനറ്റ് സൈക്കിള്‍ യാത്രാ സംഘം വൈകുന്നേരത്തോടെ മൂന്നാറിലെത്തിയത്. ആരോഗ്യകരമായ ജീവിതത്തിന് തിരിച്ചുവരവ് സൈക്കിള്‍ യാത്രകളിലേയ്ക്ക് എന്ന സന്ദേശമാണ് ഇവര്‍ ഉയര്‍ത്തുന്നത്. പ്രകൃതി സംരക്ഷണം, സാമ്പത്തിക പുരോഗതി, ഓയില്‍ സംരക്ഷണം, അന്തരീക്ഷമലിനീകരണത്തിനു കാര്യമായ കുറവ് തുടങ്ങിയ നിരവധി ലക്ഷ്യങ്ങള്‍ കൈവരിക്കാന്‍ ഇതുമൂലം കഴിയുമെന്ന് പെഡല്‍ ഫോഴ്സ് സംഘം സ്ഥാപകന്‍ ജോബി രാജു പറയുന്നു. ഇന്നലെ ഉച്ചയ്ക്ക് രണ്ടുമണിയോടെയാണ് സംഘം കൊച്ചി-ധനുഷ്‌കോടി ദേശീയപാതയിലൂടെ അടിമാലി പിന്നിട്ടത്. രാത്രി മൂന്നാറില്‍ ക്യാമ്പ് ചെയ്തശേഷം വിവിധ മേഖലകളില്‍ പര്യടനം നടത്തി ഇന്ന് രാത്രിയോടെ സൈക്കിളില്‍ തിരികെ കൊച്ചിയിലെത്തും. വിവിധ കേന്ദ്രങ്ങളില്‍ സംഘത്തിന് സ്വീകരണം ഒരുക്കിയിരുന്നു. പെഡല്‍ ഫോഴ്സിന്റെ മൂന്നാം വാര്‍ഷികത്തോടനുബന്ധിച്ചാണ് സന്ദേശയാത്ര ഒരുക്കിയത്. മൂന്നാര്‍ റിപ്പിള്‍ ടീ, മൂന്നാര്‍ ഡെസ്റ്റിനേഷന്‍ മേക്കേഴ്സ്, ലീഫ് റിസോര്‍ട്ട്, പെട്രോളിയം കണ്‍സര്‍വേഷന്‍ റിസര്‍ച്ച് അസോസിയേഷന്‍ എന്നിവരുടെ സഹകരണത്തോടെയാണ് ദ്വിദിന പരിപാടി സംഘടിപ്പിച്ചത്. നേരത്തെ പേരു നല്‍കിയിരുന്ന ആളുകളില്‍ നിന്നും തെരഞ്ഞെടുക്കപ്പെട്ട 20 പേര്‍ക്കാണ് യാത്രാ സംഘത്തില്‍ അവസരം ലഭിച്ചത്.

Continue Reading

Latest News