Connect with us
Malayali Express

Malayali Express

ജാർഖണ്ഡ്: ബിജെപിക്ക് കഷ്ടകാലം; വക്താവിന്‍റെ രാജി പാർട്ടി ഭിന്നതയിൽ

INDIA

ജാർഖണ്ഡ്: ബിജെപിക്ക് കഷ്ടകാലം; വക്താവിന്‍റെ രാജി പാർട്ടി ഭിന്നതയിൽ

Published

on

മാത്യു ജോണ്‍

ബിജെപിക്കു കഷ്ടകാലം തുടങ്ങിയോ? കൈയിലുള്ളതെല്ലാം നഷ്ടപ്പെടുന്ന അവസ്ഥയിലേക്കുകാര്യങ്ങൾ നീങ്ങുന്നു. ഇതുവരെ ഭയന്നിരുന്നവർ തിരിച്ചറിവിൽ പ്രതികരിക്കാനും തുടങ്ങിയിരിക്കുന്നു. നിയമസഭാ തിരഞ്ഞെടുപ്പിനിടെ ജാർഖണ്ഡിൽ ബിജെപിക്ക് കനത്ത തിരിച്ചടി നൽകി സംസ്ഥാന നേതാവ് രാജിവച്ചു. ബിജെപി വക്താവ് പ്രവീണ്‍ പ്രഭാകർ ആണ് രാജിവച്ചത്. മേഘാലയ മുഖ്യമന്ത്രി കൊർണാഡ് സാങ്മയുടെ എൻപിപിയിൽ അദ്ദേഹം അംഗത്വം എടുക്കുകയും ചെയ്തു. ബിജെപി ആത്മപരിശോധന നടത്തണമെന്ന് പ്രവീണ്‍ പ്രഭാകർ ആവശ്യപ്പെട്ടു. സംസ്ഥാന നേതൃത്വവുമായുള്ള ഭിന്നതയാണ് രാജിക്ക് കാരണം.

തിരഞ്ഞെടുപ്പിനിടെയുള്ള നേതാവിന്‍റെ രാജി ബിജെപിക്ക് ക്ഷീണമാകുമെന്നാണ് വിലയിരുത്തൽ. നരേന്ദ്ര മോദിയെയോ അമിത് ഷായെയോ കുറ്റപ്പെടുത്താതെയാണ് പ്രവീണ്‍ സംസാരിച്ചത്. അടുത്തിടെ തിരഞ്ഞെടുപ്പ് കമ്മീഷൻ ദേശീയ പാർട്ടി പദവി നൽകിയ കക്ഷിയാണ് സാങ്മയുടെ നാഷണലിസ്റ്റ് പീപിൾസ് പാർട്ടി (എൻപിപി). ജാർഖണ്ഡിൽ ബിജെപിക്കെതിരെയാണ് ഇവർ മൽസരിക്കുന്നത്.

ജാർഖണ്ഡ് വിദ്യാർഥി യൂണിയൻ സ്ഥാപക നേതാക്കളിൽ ഒരാളായിരുന്ന പ്രവീണ്‍ പ്രഭാകർ അഞ്ച് വർഷം മുമ്പാണ് ബിജെപിയിൽ ചേർന്നത്. നിലവിലെ നിയമസഭാ തിരഞ്ഞെടുപ്പിൽ ജാർഖണ്ഡ് വിദ്യാർഥി യൂണിയൻ സ്വന്തമായി മൽസരിക്കുകയാണ്. ഇതും ബിജെപിക്ക് തിരിച്ചടിയാണ്. ബിജെപി സ്ഥാനാർഥികളെ തീരുമാനിച്ചതിൽ അതൃപ്തിയുണ്ടായിരുന്നു പ്രവീണ്‍ പ്രഭാകറിന്. ഇക്കാര്യം അദ്ദേഹം അടുപ്പമുള്ളവരുമായി പങ്കുവച്ചിരുന്നു. തൊട്ടുപിന്നാലെയാണ് രാജി പ്രഖ്യാപിച്ചതും എൻപിപിയിൽ ചേർന്നതും. എൻപിപി സ്ഥാനാർഥിയായി നള മണ്ഡലത്തിൽ മൽസരിക്കും. പ്രധാനമന്ത്രി മോദിയിൽ നിന്നും ആഭ്യന്തര മന്ത്രി അമിത് ഷായിൽ നിന്നും ഒരുപാട് കാര്യങ്ങൾ പഠിച്ചുവെന്ന് പ്രവീണ്‍ പ്രഭാകർ പറഞ്ഞു. എന്നാൽ ജാർഖണ്ഡിലെ ബിജെപി നേതൃത്വം ആത്മപരിശോധന നടത്തണമെന്നും അദ്ദേഹം പറഞ്ഞു. അഞ്ച് ഘട്ടമായിട്ടാണ് ജാർഖണ്ഡിൽ നിയമസഭാ തിരഞ്ഞെടുപ്പ്. അഞ്ചാംഘട്ടം നടക്കുന്ന ഡിസംബർ 20നാണ് നള മണ്ഡലത്തിൽ വോട്ടെടുപ്പ്. ഡിസംബർ 23ന് ഫലം അറിയാം.

Continue Reading

Latest News