2020 നവംബറിനുള്ളില്‍ ചന്ദ്രയാന്‍ മൂന്ന് വിക്ഷേപിക്കാന്‍ ഇസ്രൊ ഒരുങ്ങുന്നു

ബെംഗളൂരു: ചന്ദ്രയാന്‍ രണ്ട് ദൗത്യത്തിന്‍റെ സോഫ്റ്റ്ലാന്‍ഡിംഗ് ശ്രമം പരാജയപ്പെട്ടതിന് പിന്നാലെ ഇസ്രൊ ചന്ദ്രയാന്‍ മൂന്ന് പദ്ധതിയുമായി മുന്നോട്ട്. ഇസ്രൊ 2020 നവംബറിനുള്ളില്‍ ചന്ദ്രയാന്‍ മൂന്ന് വിക്ഷേപിക്കാന്‍ ഒരുങ്ങുന്നുവെന്നാണ് റിപ്പോര്‍ട്ടുകള്‍. ഇതിനായി മൂന്ന് സബ് കമ്മിറ്റികള്‍ക്ക് ഇസ്രൊ രൂപം നല്‍കിയെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

അതേസമയം പുതിയ ദൗത്യത്തില്‍ ലാന്‍ഡറും റോവറും മാത്രമാണ് ഉണ്ടാകുകയെന്നാണ് സൂചന. ചൊവ്വാഴ്ച ചേര്‍ന്ന ഓവര്‍വ്യു കമ്മിറ്റി ചന്ദ്രയാന്‍ മൂന്നിന്‍റെ ടെക്നിക്കല്‍ കോണ്‍ഫിഗറേഷന്‍ സംബന്ധിച്ച കാര്യങ്ങളില്‍ തീരുമാനമെടുത്തെന്നാണ് റിപ്പോര്‍ട്ട്.

എന്നാല്‍ ഇസ്രൊയുടെ ഭാഗത്ത് നിന്ന് ഇത് സംബന്ധിച്ച ഔദ്യോഗിക അറിയിപ്പുകളൊന്നും തന്നെ വന്നിട്ടില്ല. പരാജയ പഠന സമിതി റിപ്പോര്‍ട്ടിനെക്കുറിച്ചും ഇത് വരെ പ്രഖ്യാപനങ്ങള്‍ ഉണ്ടായിട്ടില്ല.