Connect with us
Malayali Express

Malayali Express

ബംഗ്ലദേശിനെ 30 റണ്‍സിന് തോല്‍പിച്ച് ഇന്ത്യക്ക് ട്വന്റി20 പരമ്പര

LATEST NEWS

ബംഗ്ലദേശിനെ 30 റണ്‍സിന് തോല്‍പിച്ച് ഇന്ത്യക്ക് ട്വന്റി20 പരമ്പര

Published

on

ഹാട്രിക്കുള്‍പ്പെടെ 6 വിക്കറ്റുകള്‍ സ്വന്തമാക്കി ദീപക് ചഹര്‍ നിറഞ്ഞാടിയ മൂന്നാം ട്വന്റി20യില്‍ ബംഗ്ലദേശിനെ 30 റണ്‍സിന് തോല്‍പിച്ച് ഇന്ത്യ. ഇന്ത്യ ഉയര്‍ത്തിയ 175 റണ്‍സ് വിജയലക്ഷ്യം പിന്തുടര്‍ന്ന ബംഗ്ലദേശിന് 19.2 ഓവറില്‍ 144 റണ്‍സെടുക്കാന്‍ മാത്രമാണു സാധിച്ചത്. ജയത്തോടെ ഇന്ത്യ 2-1ന് പരമ്പര സ്വന്തമാക്കി.

ന്യൂഡല്‍ഹിയില്‍ നടന്ന ആദ്യ മത്സരം തോറ്റ ഇന്ത്യ തുടര്‍ന്ന് നടന്ന 2 കളികളും വിജയിച്ചാണു പരമ്പര നേടിയത്. ബംഗ്ലദേശ് ബാറ്റിങ് നിരയില്‍ യുവതാരം മുഹമ്മദ് നയീമിനു മാത്രമാണു മികച്ച പ്രകടനം നടത്താന്‍ സാധിച്ചത്. 47 പന്തുകളില്‍ 81 റണ്‍സെടുത്ത നയീം കരിയറിലെ മികച്ച സ്‌കോറുമായി പുറത്തായി. നയീം, 27 റണ്‍സെടുത്ത മുഹമ്മദ് മിഥുന്‍ എന്നിവരൊഴികെ ബംഗ്ലദേശിന്റെ മറ്റു താരങ്ങള്‍ക്കൊന്നും രണ്ടക്കം കടക്കാന്‍ സാധിച്ചില്ല.

ആറു വിക്കറ്റു വീഴ്ത്തിയ ദീപക് ചാഹര്‍ ബംഗ്ലദേശിനെ എറിഞ്ഞിടുകയായിരുന്നു. ലിറ്റന്‍ദാസ്, സൗമ്യ സര്‍ക്കാര്‍, മുഹമ്മദ് മിഥുന്‍, അമിനുല്‍ ഇസ്‌ലാം, ഷാഫിയുല്‍ ഇസ്‌ലാം, മുസ്തഫിസുര്‍ റഹീം എന്നിവരുടെ വിക്കറ്റുകളാണ് ചഹര്‍ വീഴ്ത്തിയത്. ഇന്ത്യയ്ക്കായി ശിവംദുബെ മൂന്നും യുസ്‌വേന്ദ്ര ചാഹല്‍ ഒരു വിക്കറ്റും നേടി.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ നിശ്ചിത ഓവറില്‍ 5 വിക്കറ്റ് നഷ്ടത്തില്‍ നേടിയത് 174 റണ്‍സ്. ശ്രേയസ് അയ്യര്‍, കെ.എല്‍. രാഹുല്‍ എന്നിവരുടെ അര്‍ധസെഞ്ചുറി കരുത്തിലാണ് താരതമ്യേന മികച്ച സ്‌കോറിലേക്ക് ഇന്ത്യ എത്തിയത്. രാജ്യാന്തര ട്വന്റി20 കരിയറിലെ ആദ്യ അര്‍ധസെഞ്ചുറി സ്വന്തമാക്കിയ ശ്രേയസ് അയ്യര്‍ 33 പന്തില്‍നിന്ന് 62 റണ്‍സെടുത്താണു പുറത്തായത്. താരം അടിച്ചുകൂട്ടിയത് അഞ്ച് സിക്‌സും മൂന്ന് ഫോറുകളും.35 പന്തുകളില്‍നിന്ന് 52 റണ്‍സെടുത്താണു രാഹുല്‍ പുറത്തായത്. രോഹിത് ശര്‍മ (2), ശിഖര്‍ ധവാന്‍ (16 പന്തില്‍ 19), ഋഷഭ് പന്ത് (9 പന്തില്‍ 6) എന്നിവരാണ് പുറത്തായ മറ്റ് ഇന്ത്യന്‍ താരങ്ങള്‍. മനീഷ് പാണ്ഡെയും (22) ശിവം ദുബെയും (9) പുറത്താകാതെ നിന്നു. രണ്ടാം ഓവറില്‍ ഇന്ത്യ മൂന്ന് റണ്‍സില്‍ നില്‍ക്കെയാണ് ഷാഫിയുള്‍ ഇസ്‌ലാമിന്റെ പന്തില്‍ രോഹിത് ശര്‍മ പുറത്തായത്. രണ്ട് റണ്‍സ് മാത്രമെടുത്ത രോഹിതിനെ ഷാഫിയുള്‍ ബൗള്‍ഡാക്കുകയായിരുന്നു. ഷാഫിയുളിന്റെ തന്നെ പന്തില്‍ മഹ്മൂദുല്ല ക്യാച്ച് എടുത്താണ് ധവാനെ മടക്കിയത്. സ്‌കോര്‍ 94 ല്‍ നില്‍ക്കെ അല്‍ അമിന്‍ ഹുസൈന്റെ പന്തില്‍ അര്‍ധസെഞ്ചുറി നേടിയ കെ.എല്‍. രാഹുലും പുറത്തായി.

ഋഷഭ് പന്തിന് പ്രത്യേകിച്ചൊന്നും ചെയ്യാനുണ്ടായിരുന്നില്ല. ആറ് റണ്‍സ് മാത്രമെടുത്ത പന്ത് സൗമ്യ സര്‍ക്കാരിന്റെ പന്തില്‍ ബൗള്‍ഡായി. ശ്രേയസ് അയ്യരുടെയും വിക്കറ്റ് സൗമ്യ സര്‍ക്കാരിനാണ്. ടോസ് നേടിയ ബംഗ്ലദേശ് ഇന്ത്യയെ ബാറ്റിങ്ങിന് അയയ്ക്കുകയായിരുന്നു. മൂന്നാം മത്സരത്തിലും മലയാളി താരം സഞ്ജു വി. സാംസണ് ടീമില്‍ ഇടം ലഭിച്ചില്ല.

Continue Reading

Latest News