Connect with us
Malayali Express

Malayali Express

കൊച്ചി വെള്ളത്തിൽ: ഹൈക്കോടതി ഇടപെടൽ ശക്തം; കോണ്‍ഗ്രസിന് തലവേദന

KERALA

കൊച്ചി വെള്ളത്തിൽ: ഹൈക്കോടതി ഇടപെടൽ ശക്തം; കോണ്‍ഗ്രസിന് തലവേദന

Published

on

ആദിത്യവർമ

കൊച്ചിയിലെ വെള്ളക്കെട്ടിനു പരിഹാരം തേടിയുള്ള ഹൈക്കോടതിയുടെ ഇടപെടൽ യുഡിഎഫ് ന് തലവേദനയായി. എറണാകുളം നഗരത്തിലെ വെള്ളക്കെട്ട് പരിഹരിക്കാത്തത് നഗരസഭയുടെ കഴിവുകേടാണെന്നും നഗരസഭാ കൗണ്‍സിൽ പിരിച്ചു വിടാൻ സർക്കാർ ധൈര്യം കാണിക്കണമെന്നും ഹൈക്കോടതി വാക്കാൽ വിമർശിച്ചു. നഗരത്തിലെ പേരണ്ടൂർ കനാൽ ശുചീകരണവുമായി ബന്ധപ്പെട്ട കേസിൽ അമിക്കസ് ക്യൂറിയായ അഭിഭാഷകൻ ഇന്നലെ സിംഗിൾ ബെഞ്ചിൽ ഹാജരായി നഗരം വെള്ളത്തിൽ മുങ്ങിയ സ്ഥിതി വിശദീകരിച്ചതിനെ തുടർന്നാണ് കൊച്ചി കോർപ്പറേഷനെ ഹൈക്കോടതി രൂക്ഷമായി വിമർശിച്ചത്.

കേരള മുനിസിപ്പാലിറ്റി ആക്ട് 64 പ്രകാരം നഗരസഭാ കൗണ്‍സിൽ സർക്കാർ പിരിച്ചു വിടാത്തതെന്താണെന്നു ചോദിച്ച സിംഗിൾ ബെഞ്ച് ഇന്ന് രാവിലെ അഡ്വക്കേറ്റ് ജനറൽ ഹാജരാകാനും നിർദ്ദേശിച്ചിട്ടുണ്ട്. ഹർജി പരിഗണിക്കവെ നഗരസഭാ കൗണ്‍സിൽ പിരിച്ചു വിടാൻ മറ്റൊരു കേസിൽ മറ്റൊരു ബെഞ്ചും പറഞ്ഞിട്ടുണ്ടെന്നും സിംഗിൾ ബെഞ്ച് ചൂണ്ടിക്കാട്ടി. തദ്ദേശ ഭരണ സ്ഥാപനം ഇത്തരത്തിൽ പ്രവർത്തിച്ചാൽ എന്താണ് ചെയ്യേണ്ടതെന്ന് സർക്കാരിന് അറിയില്ലേ ? നഗരസഭ കഴിവുകെട്ടതാണെങ്കിൽ സർക്കാർ ഇടപെടുകയാണ് വേണ്ടത്. നഗരം നശിക്കുന്ന സ്ഥിതിയായിട്ടും ജനങ്ങൾ എന്തുകൊണ്ടാണ് ഇതിനെതിരെ മുന്നോട്ടു വരാത്തത് ? ജനങ്ങൾ ഇടപെടാത്തതുകൊണ്ടാണ് കോടതിക്ക് ഇടപെടേണ്ടി വരുന്നതെന്നും കോടതി പറഞ്ഞൂ. നഗരസഭാ കൗണ്‍സിൽ കൊണ്ട് എന്തു പ്രയോജനമാണുള്ളതെന്ന് കോടതി ചോദിച്ചു. ഇവരെ ഒഴിവാക്കി ഏതെങ്കിലും കോർപ്പറേറ്റുകളെ ഏൽപിച്ചാൽ പോലും ഭംഗിയായി നടത്തും. കഴിഞ്ഞ പ്രളയത്തിൽ നിന്ന് ഒന്നും പഠിച്ചില്ല. ഇത്തരം മഴ നാം എങ്ങനെ നേരിടും ?മഴ പെയ്തു തോർന്നിട്ടും കുറേ ആളുകൾ ഇപ്പോഴും വെള്ളക്കെട്ടിലാണ്. സർക്കാർ എന്താണ് ചെയ്യുന്നത് ? ഇതു പ്രളയമല്ല, മഴയാണ്. ഇക്കണക്കിന് പ്രളയമുണ്ടായാൽ എന്തു ചെയ്യും ? പാവങ്ങൾ വെള്ളക്കെട്ടിൽ തന്നെ ജീവിക്കേണ്ടി വരും. കൊച്ചി നഗരത്തെ സിംഗപ്പൂരാക്കുമെന്ന് പറയുന്നു. സിംഗപ്പൂരൊന്നും ആക്കേണ്ട കൊച്ചിയാക്കിയാൽ മതി. പാവപ്പെട്ടവരെ മറക്കരുത്. എല്ലാവരും ഇക്കാര്യത്തിൽ രാഷ്ട്രീയമാണ് പറയുന്നത്. ഏറെക്കാലമായി നഗരസഭയിൽ അധികാരത്തിലുള്ളവർ ഒന്നും ചെയ്യുന്നില്ല. കലൂരിലെ കെ എസ് ഇ ബി സബ് സ്റ്റേഷൻ വർഷം തോറും വെള്ളത്തിൽ മുങ്ങുന്നു. ഇങ്ങനെ എല്ലാ വർഷവും സബ് സ്റ്റേഷൻ മുങ്ങണമെന്നാണോ ? ഇക്കാര്യത്തിൽ കെ എസ് ഇ ബിയുടെ അഭിഭാഷകൻ വിശദീകരണം നൽകണം – ഹൈക്കോടതി വാക്കാൽ പറഞ്ഞു.

പേരണ്ടൂർ കനാലിലെ നീരൊഴുക്ക് തടസപ്പെട്ടത് പനമ്പിള്ളി നഗർ, കലൂർ, കതൃക്കടവ്, എളമക്കര തുടങ്ങി നഗരത്തിലെ പ്രധാന മേഖലകളിൽ വെള്ളക്കെട്ടുണ്ടാക്കിയെന്ന് അമിക്കസ് ക്യൂറി ചൂണ്ടിക്കാട്ടി. പേരണ്ടൂർ കനാൽ നഗരത്തിന്‍റെ ജീവനാഡിയാണെന്ന് കഴിഞ്ഞ ദിവസം ഓർമ്മപ്പെടുത്തിയതാണെന്ന് ഈ ഘട്ടത്തിൽ ഹൈക്കോടതി അഭിപ്രായപ്പെട്ടു. വിഷയം ഇന്ന് വീണ്ടും പരിഗണിക്കും.

Continue Reading

Latest News