തെലുങ്ക് ഹാസ്യ താരം വേണു മാധവ് അന്തരിച്ചു

പ്രശസ്ത തെലുങ്ക് ഹാസ്യ താരം വേണു മാധവ്(39) അന്തരിച്ചു. കഴിഞ്ഞ രണ്ടാഴ്ചയായി വൃക്ക സംബന്ധമായ അസുഖത്തെ തുടര്‍ന്ന് യശോദ ആശുപത്രിയില്‍ ചികിത്സയിലായിരുന്നു. തെലുങ്ക് ദേശം പാര്‍ട്ടിയുടെ അംഗം കൂടിയാണ് വേണു മാധവ്. 1998 ല്‍ പ്രദര്‍ശനത്തിനെത്തിയ സമ്പ്രദായമെന്ന സിനിമയിലൂടെയാണ് വേണു മാധവ് ശ്രദ്ധിക്കപ്പെടുന്നത്. 150ഓളം സിനിമകളില്‍ അഭിനയിച്ചിട്ടുണ്ട്.

മാസ്റ്റര്‍, തോളി പ്രേമ, നുവീ നുവീ, യുവരാജു ദില്‍, എയ്‌സ് സിംഹാദ്രി ആന്റ് ആര്യ എന്നീ ചിത്രങ്ങള്‍ ഏറെ ശ്രദ്ധേയമാണ്. ഇതിനിടെ രാഷ്ട്രീയത്തിലും അദ്ദേഹം ചുവടുവച്ചു. ഇക്കഴിഞ്ഞ തെരഞ്ഞെടുപ്പില്‍ തെലുങ്ക് ദേശം പാര്‍ട്ടിയ്ക്കുവേണ്ടി പ്രചാരണത്തിനിറങ്ങിയിരുന്നു. 2016ല്‍ ഇറങ്ങിയ ഡോ. പരമാനന്ദയ്യ സ്റ്റുഡന്റ് എന്ന സിനിമയിലാണ് വേണു മാധവ് അവസാനമായി അഭിനയിച്ചത്. കഴിഞ്ഞ കുറച്ച് വര്‍ഷങ്ങളായി ഇദ്ദേഹത്തിന്റെ ആരോഗ്യ നില മോശമായിരുന്നു.