Connect with us
Malayali Express

Malayali Express

സെമിയില്‍ ഇന്ത്യ കിവീസിനോട് പൊരുതി തോറ്റു

LATEST NEWS

സെമിയില്‍ ഇന്ത്യ കിവീസിനോട് പൊരുതി തോറ്റു

Published

on

ഇന്ത്യയുടെ ലോകകപ്പ് പ്രതീക്ഷകള്‍ക്ക് മാഞ്ചസ്റ്ററില്‍ അന്ത്യം. അര്‍ധ സെഞ്ചുറിയുമായി രവീന്ദ്ര ജഡേജയും( 59 പന്തില്‍ നാലു ബൗണ്ടറിയും നാല് സിക്സും സഹിതം 77 റണ്‍സ്), എംഎസ് ധോണിയും( 72 പന്തില്‍ ഒരു ബൗണ്ടറിയും ഒരു സിക്സും സഹിതം 50 റണ്‍സ്) ഇന്ത്യന്‍ പ്രതീക്ഷകള്‍ക്ക് അവസാനം വരെ ഉണര്‍വ് നല്‍കിയെങ്കിലും 18 റണ്‍സ് അകലെ ആ പ്രതീക്ഷ അവസാനിക്കുകയായിരുന്നു. 49.3 ഓവറില്‍ ഇന്ത്യ 221 റണ്‍സിന് ഓള്‍ ഔട്ടായി, ന്യൂസിലാന്‍ഡിനോട് സെമിയില്‍ 18 റണ്‍സിന് തോറ്റ് ലോകകപ്പില്‍ നിന്ന് പുറത്തായി.

പൊരുതാന്‍ പോലും തയാറാകാതെ മുന്‍നിര മടങ്ങിയതാണ് ഇന്ത്യയ്ക്ക് തിരിച്ചടിയായത്. സ്‌കോര്‍ ബോര്‍ഡില്‍ 100 റണ്‍സ് കൂട്ടിച്ചേര്‍ക്കുന്നതിനിടെ ആറു വിക്കറ്റ് നഷ്ടമായ ഇന്ത്യയ്ക്കു വേണ്ടി ഏഴാം വിക്കറ്റില്‍ 116 റണ്‍സ് കൂട്ടുകെട്ടുയര്‍ത്തിയെങ്കിലും 48 ഓവറില്‍ ജഡേജയും 49-ാം ഓവറില്‍ ധോനിയും പുറത്തായതോടെ പ്രതീക്ഷകള്‍ കൈവിട്ടിരുന്നു. 72 പന്തില്‍ നിന്നും 50 റണ്‍സെടുത്ത ധോണി റണ്ണൗട്ടാകുകയായിരുന്നു.

ഓരോ റണ്‍സ് മാത്രം എടുത്താണ് ഇന്ത്യയ്ക്ക് ആദ്യ മൂന്നു നിര്‍ണായക വിക്കറ്റുകള്‍ വീണത്. രോഹിത് ശര്‍മ്മ( നാല് പന്തില്‍ ഒന്ന്)യുടെ വിക്കറ്റാണ് ഇന്ത്യയ്ക്ക് ആദ്യം നഷ്ടമായത്. മാറ്റ് ഹെന്റിയാണ് വിക്കറ്റ് വേട്ട ആരംഭിച്ചത്. തൊട്ടുപിന്നാലെ ഗാലറിയെ നിശബ്ദമാക്കി ക്യാപ്റ്റന്‍ വിരാട് കോഹ്ലിയും വീണു. ട്രന്റ് ബോള്‍ട്ട് കോഹ്ലിയെ എല്‍ബിയില്‍ കുരുക്കുകയായിരുന്നു. മൂന്നാം ഓവറില്‍ ഓപ്പണര്‍ കെഎല്‍ രാഹുലും കോഹ്ലിക്കു പിന്നാലെ മടങ്ങി. മാറ്റ് ഹെന്റിയുടെ പന്തില്‍ കെഎല്‍ രാഹുലിനെ ടോം ലാതത്തിന്റെ കൈകളില്‍ എത്തിക്കുകയായിരുന്നു.

നാലാം വിക്കറ്റില്‍ ഋഷഭ് പന്ത് – കാര്‍ത്തിക് സഖ്യം ഇന്ത്യയെ കരകയറ്റുമെന്ന് പ്രതീക്ഷ ഉയര്‍ത്തിയെങ്കിലും അത്യുഗ്രന്‍ ക്യാച്ചിലൂടെ ദിനേഷ് കാര്‍ത്തിക്കിനേയും കൂടാരം കയറ്റി. 25 പന്തില്‍ ഒരു ബൗണ്ടറി ഉള്‍പ്പെടെ ആറു റണ്‍സ് എടുത്താണ് ദിനേഷ് കാര്‍ത്തിക് വീണത്. മാറ്റ് ഹെന്റിയാണ് കാര്‍ത്തിക്കിനേയും മടക്കിയത്. പിന്നാലെ ഇന്ത്യയ്ക്ക് പ്രതീക്ഷയുയര്‍ത്തി ഋഷഭ് പന്ത്- പാണ്ഡ്യ സഖ്യം കളംനിറഞ്ഞെങ്കിലും സാന്റ്നറുടെ പന്തില്‍ ഗ്രാന്‍ഡ്ഹോമിന് അനാവശ്യ ക്യാച്ചു നല്‍കി പന്തും മടങ്ങി. തൊട്ടു പിന്നാലെ പ്രതീക്ഷയുണര്‍ത്തിയ ക്രീസില്‍ നിലയുറപ്പിച്ച ഹാര്‍ദിക് പാണ്ഡ്യയും (62 പന്തില്‍ 32 റണ്‍സ്) സാന്റ്നര്‍ക്ക് മുന്നില്‍ വീണു. ന്യൂസിലാന്‍ഡിനായി മാറ്റ് ഹെന്റി മൂന്ന് വിക്കറ്റുകള്‍ വീഴ്ത്തി. മിച്ചല്‍ സാന്റ്നറും,ട്രെന്റ് ബോള്‍ട്ടും രണ്ട് വിക്കറ്റും, ഫെര്‍ഗൂസന്‍, നീഷാം എന്നിവര്‍ ഓരോ വിക്കറ്റും വീഴ്ത്തി.

മഴയെ തുടര്‍ന്ന് ഇന്നത്തേക്ക് മാറ്റിവെച്ച സെമി അങ്കത്തില്‍ ന്യൂസിലാന്‍ഡ് നിശ്ചിത 50 ഓവറില്‍ എട്ട് വിക്കറ്റ് നഷ്ടത്തില്‍ 239 റണ്‍സെടുക്കുകയായിരുന്നു. കെയ്ന്‍ വില്യംസണിന്റെയും( 95 പന്തില്‍ ആറു ബൗണ്ടറി സഹിതം 67 റണ്‍സ്) റോസ് ടെയ്ലറിന്റെയും( 90 പന്തില്‍ മൂന്ന് ബൗണ്ടറിയും ഒരു സിക്സും സഹിതം 74 റണ്‍സ്) ബാറ്റിങ്ങ് മികവിലാണ് കിവിപ്പട ഭേദപ്പെട്ട സ്‌കോര്‍ വിജയലക്ഷ്യം ഉയര്‍ത്തിയത്.

74 റണ്‍സെടുത്ത് നില്‍ക്കെ റോസ് ടെയ്ലറിനെ ബുമ്രയുടെ അവസാന പന്തില്‍ റണ്‍ ഔട്ട് ആക്കുകയായിരുന്നു. തൊട്ടടുത്ത ഓവറില്‍ ആദ്യ പന്തില്‍ തന്നെ ഭുവനേശ്വര്‍ കുമാര്‍ ടോം ലാതത്തിന്റെ വിക്കറ്റ് പറിച്ചു. 11 പന്തില്‍ 10 റണ്‍ശസടുത്താണ് ലാതം മടങ്ങിയത്. ഇതേ ഓവറില്‍ അവസാന പന്തില്‍ ഹെന്റിയേയും( രണ്ട് പന്തില്‍ ഒരു റണ്‍സ്) ഭുവി മടക്കി. ആറു പന്തില്‍ ഒരു ബൗണ്ടറി സഹിതം ഒന്‍പത് റണ്‍സെടുത്ത മിച്ചല്‍ സാന്റ്നറും, മൂന്ന് പന്തില്‍ മൂന്ന് റണ്‍സെടുത്ത് ട്രെന്റ് ബോള്‍ട്ടും പുറത്താകാതെ നിന്നു. ഇന്ത്യയ്ക്കായി ഭുവനേശ്വര്‍ കുമാര്‍ മൂന്ന് വിക്കറ്റും, ജസ്പ്രീത് ബുമ്ര, ഹാര്‍ദിക് പാണ്ഡ്യ, രവീന്ദ്ര ജഡേജ, യുസ്വേന്ദ്ര ചഹല്‍ എന്നിവര്‍ ഓരോ വിക്കറ്റ് വീതവും വീഴ്ത്തി.

ആദ്യം ബാറ്റ് ചെയ്ത ന്യൂസിലന്‍ഡ് 46.1 ഓവറില്‍ അഞ്ചു വിക്കറ്റ് നഷ്ടത്തില്‍ 211 റണ്‍സ് എടുത്തുനില്‍ക്കെ മഴയെത്തുകയായിരുന്നു. തുടര്‍ന്ന് ഒരു പന്തുപോലും എറിയാനാകാതെ മത്സരം ഉപേക്ഷിക്കാന്‍ അമ്പയര്‍മാര്‍ തീരുമാനിക്കുകയായിരുന്നു.

Continue Reading

Latest News