പ്രവാസി മലയാളി അനിത പുല്ലയിലിന് എതിരെയുള്ള മോന്സന് മാവുങ്കലിന്റെ ഫോണ് സംഭാഷണം പുറത്ത്. ഇരുവരും തമ്മിലുള്ള സാമ്പത്തിക ഇടപാടുകളെക്കുറിച്ച് മോന്സന് പരാതിക്കാരുമായി നടത്തിയ സംഭാഷണമാണ് പുറത്തായത്. അനിതയുടെ സഹോദരിയുടെ വിവാഹത്തിന് 18 ലക്ഷം രൂപ മുടക്കിയത് താനാണെന്നാണ് ഇതില് മോന്സന് പറയുന്നത്. ഒരു മാസത്തിനകം യുറോ ആയി പണം നല്കാമെന്ന് അനിത പറഞ്ഞിരുന്നു. എന്നാല് പണം മടക്കി ചോദിച്ചതോടെ അനിതയ്ക്ക് വിരോധമായി. പണം തന്റെ അക്കൗണ്ടില് നിന്ന് കൊടുത്തതിന് രേഖകളുണ്ട്. എല്ലാം വെളിപ്പെടുത്തിയാല് അനിത കുടുങ്ങുമെന്നും ഫോണ് സംഭാഷണത്തില് മോന്സന് പറയുന്നുണ്ട്.
മോന്സന് മാവുങ്കലിന്റെ തട്ടിപ്പുമായി ബന്ധപ്പെട്ട് അനിത പുല്ലയിലിന്റെ മൊഴി ക്രൈംബ്രാഞ്ച് രേഖപ്പെടുത്തി. വീഡിയോ കോള് വഴിയാണ് മൊഴി രേഖപ്പെടുത്തിയത്. അനിതയുടെ സാമ്പത്തിക ഇടപാടുകള് ക്രൈംബ്രാഞ്ച് ചോദിച്ചറിഞ്ഞു. മോന്സന് മാവുങ്കലിനെ മുന് ഡിജിപി ലോക്നാഥ് ബെഹ്റയ്ക്ക് പരിചയപ്പെടുത്തിയത് താന് ആണെന്ന് അനിത പുല്ലയില് പറഞ്ഞിരുന്നു.
മോന്സന്റെ പുരാവസ്തു തട്ടിപ്പിനെക്കുറിച്ച് സുഹൃത്തായ അനിത പുല്ലയിലിന് എല്ലാമറിയാമായിരുന്നുവെന്ന് മുന് ഡ്രൈവര് അജി വെളിപ്പെടുത്തിയിരുന്നു. മോന്സന്റെ മ്യൂസിയം അനിത ഓഫീസ് ആയി ഉപയോഗിച്ചതായും വിദേശമലയാളികളായ ഉന്നതരെ മോന്സന് പരിചയപ്പെടുത്തിയത് അനിതയാണെന്നും അജി മൊഴി നല്കിയിരുന്നു. 2019 മെയ്മാസം അനിത പ്രവാസിമലയാളി ഫെഡറേഷന് ഭാരവാഹികള്ക്കൊപ്പം മോന്സന്റെ വീട്ടില് എത്തിയിരുന്നു. ഒരാഴ്ച കലൂരിലെ വീട്ടില് താമസിച്ച അനിതയോട് അന്നത്തെ മാനേജര് തട്ടിപ്പിനെക്കുറിച്ച് എല്ലാം പറഞ്ഞതായാണ് അജി വെളിപ്പെടുത്തുന്നത്.
എന്നാല് തട്ടിപ്പിനെക്കുറിച്ച് അറിഞ്ഞിട്ടും അനിത പുല്ലയില് ഇതുവരെ എവിടെയും പരാതി നല്കിയിട്ടില്ല. മോന്സന്റെ തട്ടിപ്പ് മനസ്സിലായിട്ടും അനിത സൗഹൃദം തുടര്ന്നിരുന്നു. ഈ കാലയളവിലാണ് അനിത മുന് ഡിജിപിയെ മ്യൂസിയത്തിന്റെ പൊലിമ വിവരിച്ച് കലൂരിലെ സന്ദര്ശനത്തിന് ക്ഷണിച്ചത്. ഇടുക്കിയിലെ രാജകുമാരി എസ്റ്റേറ്റില് മോന്സന്റെ പിറന്നാള് ആഘോഷത്തില് അനിത സജീവമായിരുന്നു. മോന്സനുമായി തെറ്റിപ്പിരിഞ്ഞതിന് ശേഷം മോന്സന്റെ അടുത്ത സുഹൃത്തായ ഐജി ലക്ഷണണയുമായി അനിത നടത്തിയ ചാറ്റും പുറത്ത് വന്നിരുന്നു. മോന്സനെ സൂക്ഷിക്കണമെന്ന് ലോക്നാഥ് ബഹ്റ തന്നോട് പറഞ്ഞിരുന്നതായും അനിത പുല്ലയില് ഐജി ലക്ഷമണയോട് സംസാരിക്കുന്നുണ്ട്.
ആദിത്യവര്മ