തിരുവനന്തപുരം: എട്ട് വൈസ് ചാന്‍സലര്‍മാരുടെ ശമ്ബളം തിരിച്ചുപിടിക്കുന്നത് സംബന്ധിച്ച്‌ രാജ്ഭവന്‍ നിയമോപദേശം തേടി.
നിയമനം നടത്തിയ ശേഷം ഇതുവരെ ലഭ്യമായ ശമ്ബളം തിരിച്ചെടുക്കാനാണ് ആലോചന. ഗവര്‍ണര്‍ ആരിഫ് മുഹമ്മദ് ഖാന്‍ സംസ്ഥാനത്ത് തിരിച്ചെത്തിയാല്‍ ഉത്തരവ് പുറപ്പെടുവിക്കുമെന്നാണ് വിവരം.
യു.ജി.സി ചട്ടങ്ങള്‍ ലംഘിച്ച്‌ നിയമിക്കപ്പെട്ട വൈസ് ചാന്‍സലര്‍മാരെ സര്‍വീസില്‍ നിന്ന് പിരിച്ചുവിടാതിരിക്കാന്‍ എന്തെങ്കിലും കാരണമുണ്ടെങ്കില്‍ അറിയിക്കണമെന്ന് കാണിച്ച്‌ ഗവര്‍ണര്‍ കാരണം കാണിക്കല്‍ നോട്ടീസ് നല്‍കിയിരുന്നു. ഇവരുടെ ശമ്ബളം തിരിച്ചുപിടിക്കുന്നത് നിയമപരമാണോയെന്നും കോടതി വിധി എത്രത്തോളം പ്രധാനമാണെന്നും ഗവര്‍ണര്‍ ഇപ്പോള്‍ നിയമോപദേശം തേടിയിട്ടുണ്ട്.
അനധികൃതമായി തസ്തികയിലേക്കു വന്നവരുടെ ശമ്ബളം തിരിച്ചെടുക്കണമെന്നായിരുന്നു നേരത്തെ ഗവര്‍ണറുടെ നിലപാട്. ഈ അഭിപ്രായത്തില്‍ തുടര്‍നടപടികള്‍ സ്വീകരിക്കുന്നതിന്‍റെ ഭാഗമായി വിശദമായ നിയമോപദേശം തേടിയിരിക്കുകയാണ് ഇപ്പോള്‍.
