മൂവാറ്റുപുഴ: ഒന്നര പതിറ്റാണ്ട് മുമ്ബ് ആരംഭിച്ച കല്ലൂര്‍ക്കാട് ഫയര്‍സ്റ്റേഷന്‍ പരിമിതികള്‍ മൂലം വലയുകയാണ്.
സ്റ്റേഷന്‍ പുതുക്കിപ്പണിയാന്‍ രണ്ടുവര്‍ഷം മുമ്ബ് നടപടി ആരംഭിച്ചെങ്കിലും ഒന്നുമായിട്ടില്ല. പരാതികള്‍ ഉയര്‍ന്നതിനെ തുടര്‍ന്ന് മുന്‍ എം.എല്‍.എ, എല്‍ദോ എബ്രഹാമിന്‍റെ കാലത്താണ് പുതിയ മന്ദിരം നിര്‍മിക്കാന്‍ നടപടി ആരംഭിച്ചത്.
3.5 കോടി രൂപ ചെലവില്‍ എസ്റ്റിമേറ്റും തയാറാക്കി. എന്നാല്‍, ഫണ്ടില്ലെന്ന കാരണത്താല്‍ മുന്നോട്ടുപോകാനായില്ല. പഞ്ചായത്ത് വിട്ടുകൊടുത്ത 23 സെന്റ് സ്ഥലത്ത് 2006 ലാണ് ഫയര്‍ സ്റ്റേഷന്‍ പ്രവര്‍ത്തനമാരംഭിച്ചത്. 34 ജീവനക്കാരും, മൂന്നു വാഹനങ്ങളുമാണ് ഇവിടെയുള്ളത്. പഴയ കെട്ടിടമായതിനാല്‍ ആവശ്യത്തിന് സൗകര്യങ്ങളില്ല. ജീവനക്കാര്‍ക്ക് വിശ്രമിക്കുന്നതിനും, വാഹനങ്ങള്‍ കയറ്റി ഇടുന്നതിനും സംവിധാനമില്ല. ആസ്ബറ്റോസ് ഷീറ്റിന് കീഴിലെ വിശ്രമ കേന്ദ്രത്തില്‍ വേനല്‍ക്കാലത്ത് ഇരിക്കാനുമാകില്ല. കുടിവെള്ള പ്രശ്നവും രൂക്ഷമാണ്.
