കാബേജ് വിളവെടുപ്പ് കണ്ണീരില്‍.. കിലോഗ്രാമിന് വില ആറു രൂപ മാത്രം.

മറയൂര്‍: സംസ്ഥാനത്തെ ശീത കാലപച്ചക്കറികളുടെ കലവറയായ കാന്തല്ലൂരിലെ കാബേജ് വിളവെടുപ്പ് കണ്ണീരിലായി . ഒരു കിലോ ഗ്രാം കാബേജിന് തോട്ടങ്ങളില്‍ ഒന്നാം തരം കാബേജിന് ആറു രൂപ മാത്രമാണ് ലഭിക്കുന്നത്. കാന്തല്ലൂര്‍ മേഖലയില്‍ എല്ലാ കാലത്തും ജല സേചന സൗകര്യം അനുസരിച്ച ചെയ്യാവുന്ന കൃഷിയാണ് കാബേജും – ക്യാരറ്റും. കാന്തല്ലൂരിലെ പെരുമല ,പുത്തൂര്‍, കീഴാന്തൂര്‍, നാരാച്ചി, എന്നിവടങ്ങളിലെ നൂറ് കണക്കിന് കര്‍ഷകരാണ് കാബേജും കാര്യാറ്റും കൃഷിചെയ്യുന്നത്. കഴിഞ്ഞ രണ്ടാഴ്ച്ചകാലമായാണ് പതിനൊന്ന് മുതല്‍ പതിനഞ്ച് രൂപ വരെ വിലയുണ്ടായിരുന്ന കാബേജിന്‍റെ വില അഞ്ചു രൂപ മുതല്‍ ആറു രൂപയിലേക്ക് താഴ്ന്നത്.
തമിഴ്നാട്ടിലെ മേട്ടുപ്പാളയം മാര്‍ക്കറ്റിലേക്ക് ഊട്ടി നീലഗിരിയില്‍ നിന്നും കാബേജ് ക്യാരറ്റ് എന്നിവ മുന്‍വര്‍ഷങ്ങളിലേതിന് അപേക്ഷിച്ച് മൂന്നിരട്ടി എത്തിയതും അത് കേരളത്തിലെ വിവിധ മാര്‍ക്കറ്റിലേക്ക് എത്തി തുടങ്ങിയതുമാണ് കാബേജിന്‍റെ വില കുത്തനെ ഇടിയാന്‍ കാരണമായിരിക്കുന്നത്.

നിലവില്‍ കര്‍ഷകര്‍ക്ക് ആറുരൂപ മാത്രം ലഭിക്കുന്നതിനാല്‍ വിളവെടുപ്പ് തന്നെ നഷ്ടത്തിലാകുമെന്നാണ് കര്‍ഷകര്‍ പറയുന്നത്. ഹോര്‍ട്ടി കോര്‍പ്പ് സംഭരിക്കുന്നുണ്ടെങ്കിലും വിലകുറവാണ് കര്‍ഷകരെ വലക്കുന്നത്. ശരാശരി പന്ത്രണ്ട് രൂപയെങ്കിലും ലഭിച്ചില്ലെങ്കില്‍ കാബേജ് കൃഷി വലിയ നഷ്ടമായി തീരുമെന്നാണ് കര്‍ഷകനായ പുത്തൂര്‍ സ്വദേശി രാമകൃഷ്ണന്‍ പറയുന്നത്. കാന്തല്ലൂരിലെ വിഷ രഹിത പച്ചക്കറികള്‍ക്ക് വിപണിയില്‍ പ്രത്യേക മാര്‍ക്കറ്റ് ഉണ്ടാക്കിയാല്‍ മാത്രമേ തങ്ങള്‍ക്ക് ഉയര്‍ന്ന വില ലഭിക്കു എന്നാണ് കാന്തല്ലൂരിലെ കര്‍ഷകരുടെ അഭിപ്രായം.

SEND YOUR ARTICLES AND NEWS TO news@malayaliexpress.com.