കൊച്ചി: വേനലിനോടടുക്കുന്ന കാലാവസ്ഥയില് ജലജന്യരോഗങ്ങളായ ഷിഗെല്ല ഉള്പ്പെടെയുള്ള വയറിളക്ക രോഗങ്ങള്, മഞ്ഞപ്പിത്തം, ടൈഫോയിഡ് എന്നിവ പടരാന് സാധ്യതയേറെയായതിനാല് ജനങ്ങള് അതിജാഗ്രത പാലിക്കേണ്ടതാണെന്ന് ജില്ല മെഡിക്കല് ഓഫിസര് (ആരോഗ്യം) അറിയിച്ചു.
പ്രതിരോധ നടപടികള് ശക്തമാക്കുന്നതിെന്റ ഭാഗമായി വരും ദിവസങ്ങളില് കുടിവെള്ളം കൊണ്ടുവരുന്ന ടാങ്കര് ലോറികള്, ഹോട്ടലുകള്, വഴിയോര ഭക്ഷണ ശാലകള്, കൂള് ബാറുകള്, ഹോസ്റ്റലുകള് എന്നിവിടങ്ങളില് പരിശോധന ശക്തമാക്കും. ഈ വര്ഷം ഇതുവരെ ജില്ലയില് 2972 പേര്ക്ക് വയറിളക്കരോഗങ്ങളും സംശയിക്കുന്ന എട്ട് ടൈഫോയിഡ് കേസും രണ്ടു മഞ്ഞപ്പിത്ത കേസും (ഹെപ്പറ്റൈറ്റിസ് എ) റിപ്പോര്ട്ട് ചെയ്തിട്ടുണ്ട്. മലത്തില് രക്തം കാണുക, അതിയായ വയറിളക്കവും ഛര്ദിയും, വയറിളക്കത്തോടൊപ്പം കടുത്ത പനി, മൂത്രം പോകാതിരിക്കുക, ക്ഷീണം, മയക്കം, അപസ്മാരം എന്നിവ ഉണ്ടായാല് പാനീയ ചികിത്സ നല്കുന്നതോടൊപ്പം തന്നെ അടിയന്തര വൈദ്യസഹായം തേടണം.
ദിവസങ്ങളോളം നീളുന്ന പനി, ദേഹവേദന, ക്ഷീണം, വിശപ്പില്ലായ്മ എന്നിവയാണ് ടൈഫോയിഡിന്റെ സാധാരണ കണ്ടുവരുന്ന രോഗലക്ഷണങ്ങള്. ടാപ്പില്നിന്നുമുള്ള വെള്ളം കുടിക്കുന്നതും വഴിയോരത്തുനിന്ന് ഐസ് വാങ്ങിച്ചു കഴിക്കുന്നതും ടൈഫോയിഡ് പോലെയുള്ള രോഗങ്ങള് പിടിപെടാന് കാരണമാകുന്നുണ്ട്. ശരീരവേദനയോടുകൂടിയ പനി, തലവേദന, ക്ഷീണം, ഓക്കാനം, ഛര്ദി തുടങ്ങിയവയാണ് മഞ്ഞപ്പിത്തത്തിന്റെ പ്രാരംഭലക്ഷണങ്ങള്.